سوق الخضار - الفرضه

الفرضه ؟

مع ان عايلتي صغيره واذا بغيت خضره او ميوه كافي علينا كيسين من فرع الخضار بالجمعيه. بس احب دايما اروح الفرضه بالشويخ واخذ اليهال معاي واهم مستانسين بعد يبا نبي هذا وذاك الين يترسون العربانه وعليهم ستين الف عافيه. عالعموم في شي خطير حاصل وادري بتقولون شدعوه وتدقق وايد بس صدقوني احنا بخير ونعمه ولكن هم الله ما يرضى بالاسراف. الموضوع ياجماعة الخير الاسعار المرتفعه والغش عيني عينك يعني انا بحياتي ما شفت خيار وطماط في صندوق فلين . تدرون شنو اللي صاير البياعين يطلعون الخضار والميوه من صناديقها الاصليه الكبيره ويحطونها في صناديق فلين بكميات قليله علشان يكون سعر الفلين يعادل الصندوق الكبير الاصلي والبلديه عادي ولاهم مهتمين . قبل كنت اترس العربانه من ميوه وخضره بأقل من عشرين دينار الحين اطلع من الفرضه بمو اقل من ثلاثين دينار وبكميات قليله بعد. واحلى نكته سألت البنغالي عن صندوق كرز فقالى بسعر دبل عن السوق ولما سألته ليش سعرك عالى تدرون شرد؟ هذا الكرز لبناني وواصل بالطياره؟؟؟؟

واللى مستغرب منه ان لما اكاسر اي بايع يقولي والله مربحي في الصندوق 100 فلس يعني مومعقوله لو يبيع باليوم 200 صندوق يطلعله 20 دينار

وينكم يابلديه عن الجشع والطمع من التجار اللي لاعبين لعب بسوق الخضره والسمك واللحم ولا هالاجانب لاعبين لعب في الاسعار

(ملاحظه ترى صوره الموضوع لسوق المباركيه وهم بعد الاسعار دبل الشويخ)

المعاش

المعاش ؟ على فكره الموضوع يتعلق في الاشخاص اللي مصدر دخلهم الوحيد اهو الراتب والراتب مهما كان ترى ما يلبي احتياجات الاسره الكويتيه وخلوني افصلها لكم

اللي يدفع ايجار وتعرفون قيمة الايجارات يعني اللي باني شقق في بيته بيت النازل 300 دينار والعماير تدرون ماتنسكن وكلها مشاكل انزين تعال حق مستلزمات الاسره مثل اغراض الجمعيه يبيلك بالشهر دشتين للجمعيه يعني معدل 120 دينار بالشهر. بعد اقصاد السياره يعني تدرون الكويتين كشيخه معدل القصد لخمس سنوات ودفعه اخيره بعد بمعدل 180 دينار واذا سياره موفخمه بمعدل 120 دينار. وبعد المصروف اليومي لأسره مكونه من3 اشخاص بمعدل 10 دنانير باليوم ومع بانزين السياره فوق البيعه يعني 300 دينار. تعالوا نحسبها بكل بساطه تقريبا 1020 دينار.ومعدل الرواتب تقريبا 900 دينار بعد الخصميات